Mar 6:14-29 | YomNWM | STEP | Ntinu Elode wuwa zitsangu zi Yesu, bila dizina diandi ditembakanamu zindambu zioso. Baba tubanga : —Yowani Mbotiki niandi wufulukidi mu bafua ! Diawu kadidi lulendo luvangilabikumu.

Mark 6:14-29

Lufua lu Yowani Mbotiki

(Matayi 14.1-2 ; Luka 9.7-9)

14 Ntinu Elode wuwa zitsangu zi Yesu, bila dizina diandi ditembakanamu zindambu zioso. Baba tubanga :

—Yowani Mbotiki niandi wufulukidi mu bafua ! Diawu kadidi lulendo luvangilabikumu.

15 Vayi bankaka baba tubanga :

—Niandi Eli. Bankaka diaka ti :

—Widi mbikudi banga wumosi mu mimbikudi.

16 Vayi Elode bu kawa mambu momo, buna wutuba :

—Yowani mutu ndizengisa ntu, niandi wufulukidi !

(Matayi 14.3-13 ; Luka 3.19-20)

17 Muaki niandi veka Elode wuvana lutumunu mu buila yowani ayi wunkangisa mu zisieni mu nloko mu diambu Elode kakuela Elodiasi nketo nkhombꞌandi Filipi. 18 Bila Yowani wuba kambanga ntinu Elode :

—Wusi ko minsua mu kuela nketo khombꞌaku !

19 Elodiasi wumfuemina ayi wuntombila diluaku di kumvondila. Vayi kasia nunga ko. 20 Bila Elode tsisi kaba monanga Yowani bila wuzaba ti Yowani wuba mutu wusonga ayi wunlongo. Diawu kaba ku nkebilanga bumbote. Bu kaba kunwanga buna wuba yindulanga buwombo ayi khini kaba monanga mu kunwa.

21 Vayi lumbu kimosi diluaku dimonika mu thangu Elode, mu lumbu ki nyengo wu mbutukulu andi ; kakubika nyengo wunneni wu ndiwulu, wutumisa bapfumu zioso zi leta, bapfumu zioso zi masodi ayi bapfumu zioso zi malamu zunga ki Ngalili muingi biza dia ku nzoꞌandi. 22 Mu thangu yi nyengo, muana ndumba wu Elodiasi wukota muna nzo, wukina. Wumonisa Elode khini va kimosi ayi batu boso Elode katumisa ku nyengo. Diawu ntinu kakambila muana ndumba beni :

—Wundomba kioso tidi, ndieka kuvana kiawu. 23 Wumvana tsila bu kaleva ndefi ti kioso kuandi wunlomba, yiba kuandi ti ndambu yi kipfumu kiama, ndieka kuvana kiawu !

24 Muana ndumba beni wuyenda yuvula ngudi andi :

—A mbi ndomba e ?

Ngudi andi wunkamba :

—Ntu wu Yowani Mbotiki !

25 Buna muana ndumba wuvika vutuka nsualu kuidi ntinu ayi wunkamba :

—Thidi mu nsualu wuphana buabu ntu wu Yowani Mbotiki mu dilonga.

26 Ntinu wumona kiadi, vayi mu diambu di zindefi zi kaleva ayi batu bobo batumusu ; buna kasia zola kunyimina wawu ko. 27 Buna ntinu wufidisa disodi dimosi mu masadi momo maba kunsungangaayi wuntuma kanata ntu wu Yowani. Disodi beni diyenda kuna nloko ayi dizenga ntu wu Yowani. 28 Dinata ntu beni mu dilonga ; divana wawu kuidi muana ndumba bosimuana wuyenda wuvana kuidi ngudi andi. 29 Minlonguki mi Yowani bu miwa nsamu, miyiza bonga nitu andi, mizika yawu.